Svi u Briselu mogu vidjeti kako dolazi Trampov tornado, ali većina i dalje misli da može pobjeći od njega, ali neće, poručio je mađarski premijer.
Premijer Mađarske Viktor Orban izjavio je u utorak da je američki predsjednik Donald Tramp (Trump) već “okrenuo svijet naglavačke”, javlja Anadolija.
Orban smatra da Evropi slijede teški mjeseci jer većina birokrata u Briselu misli da može pobjeći od nadolazećeg “Trampovog tornada”.
– Juče smo održali prvi samit EU u Briselu od inauguracije predsjednika Trampa. Bilo je to čudno okupljanje. Svi u Briselu mogu vidjeti kako dolazi Trampov tornado, ali većina i dalje misli da može pobjeći od njega. Neće – naveo je Orban na društvenoj mreži X.
Trampove mjere
Ističući kako je Tramp za dvije sedmice uveo nekoliko mjera kojima je “okrenuo svijet naglavačke“, Orban je kazao da je tim mjerama završeno “rodno ludilo” u Americi, završeno finansiranje “globalističkih Soroševih organizacija, okončane ilegalne migracije, te okončana podrška rusko-ukrajinskom ratu”.
– Drugim riječima, sve što su nam birokrate u Briselu pokušavale natjerati u grlo posljednjih godina je gotovo. Ali tu je nešto drugo. Možemo se i oprostiti od pravila svjetske trgovine kakve poznajemo. Predsjednik Tramp će se zalagati za američke interese, čak i protiv Evrope. Pred Evropskom unijom su teški mjeseci, a birokrate u Briselu će imati težak period – naveo je Orban.
Ekonomski odnosi
Naglasivši nužnost sporazuma za očuvanje ekonomskih odnosa sa Sjedinjenim Državama, Orban je istakao da dobar posao mogu napraviti lideri koji se međusobno poznaju i poštuju.
– Znali smo da će se predsjednik Tramp vratiti, pa smo bili spremni. Stalno pregovaramo i napravićemo dobar dogovor sa novom administracijom Sjedinjenih Američkih Država. A šta je sa birokratama u Briselu? Namjestili ste krevet, sada lezite u njega! – poručio je Orban.
Trgovinski rat
Trampov povratak na mjesto predsjednika SAD-a ponovo je izazvao zabrinutost zbog potencijalnih trgovinskih ratova između SAD i EU.
Trampova administracija navodno razmatra uvođenje carina u rasponu od deset do 20 posto na sav uvoz i do 100 posto na automobile, navodeći potrebu da se zaštite američki poslovi i pozabave praksama “nepoštene trgovine“ iz Evrope.
On je 1. februara potpisao odluku i uveo carinu od 25 posto na uvoz iz Kanade i Meksika i carinu od deset posto na kinesku robu.
Iako se spekuliše da bi EU mogao uzvratiti recipročnim povećanjem carina, njegova fragmentirana politička struktura mogla bi zakomplikovati usvajanje jedinstvenog odgovora.
Srpska info/FOTO: JAKUB GAVLAK/EPA
